SİYASƏT


Hərbi hissədə vətənpərvərlik tədbiri keçirilib

Müasir Azərbaycan Respublikasının və Azərbaycan Ordusunun qurucusu ulu öndər Heydər Əliyevin xatirəsi bu günlər bir daha ehtiramla yad edilir, məzarı və şərəfinə ucaldılan möhtəşəm abidələri minnətdarlıqla ziyarət olunur. Dahi rəhbərin zərb məsələ, atalar sözünə çevrilən müdrik fikirləri tez-tez xatırlanır və bu fikirlər hər bir kəsə Vətənə, xalqa, dövlətə necə sədaqətlə xidmət etməyin yollarını göstərir.

26 il öncə əbədiyaşar Ali Baş Komandanımız Bakı ətrafında yerləşən hərbi hissələrdən birində döyüşçüləri cəbhəyə yola salarkən, onlara xeyir-dua verərkən demişdir: “Vətənin, torpağın keşiyində daha cəsarətlə, daha mətinliklə durun. Vətəni qoruyun. Xalq, Vətən sizin şücaətinizi layiqincə qiymətləndirəcək və heç vaxt unutmayacaqdır”.

Dekabrın 13-də həmin hərbi hissənin ərazisində yeni salınmış müasir hərbi şəhərciyin klubunda Müdafiə Nazirliyi və Bakı Bələdiyyə Teatrının birgə təşkilatçılığı ilə keçirilən növbəti vətənpərvərlik tədbirində Ulu Öndərimizin şüara çevrilən bu fikirləri də bir daha xatırlanıb və Azərbaycan əsgərini daha böyük qələbələr qazanmağa ruhlandırıb.

© Materiallardan istifadə edərkən hiperlinklə istinad olunmalıdır