Fransada builki prezident seçkiləri əvvəlkilərdən fərqlənir. Əvvəllər seçkilərə namizədlər arasında ənənəvi debatlar təşkil olunurdu. Namizədlər proqramlarını təqdim edir və xalqa seçildikləri təqdirdə görəcəkləri işlərlə bağlı vədlər verirdilər. Ancaq bu il belə debatlar baş tutmadı. Bu isə seçicilər arasında, ümumiyyətlə, cəmiyyətdə çaşqınlıq yaradıb, insanların çoxu tərəddüd içindədir. Seçicilər namizədlərin konkret təkliflərlə çıxış etməməsindən narazıdırlar. Prezident seçkiləri ilə bağlı aparılan sosial sorğuların nəticələri də insanların namizədlərdən gözlədikləri vədləri eşitmədiklərini bildirir. Fransızları əsasən sosial, iqtisadi məsələlər, ölkənin yenidən sənayeləşməsi, yeni iş yerlərinin yaradılması, həyat tərzinin, alıcılıq qabiliyyətinin yüksəldilməsi, həmçinin Fransanın təhlükəsizliyi və ölkədə sülhün qarantı olması kimi məsələlər daha çox maraqlandırır.