Nəqliyyat, Rabitə və Yüksək Texnologiyalar Nazirliyinin “Aztelekom” Məhdud Məsuliyyətli Cəmiyyətinin (MMC) kollektivi ekoloji aksiya çərçivəsində Xaçmaz rayonunun Nabran qəsəbəsində yerləşən sahilyanı çimərlik əraziləri və meşə massivini məişət tullantılarından təmizləyib.

AZƏRTAC-ın bölgə müxbiri xəbər verir ki, aksiyanın keçirilməsində məqsəd dənizin çirkləndirilməsinin qarşısının alınması, o cümlədən sahilyanı ərazilərdə təmizliyə riayət olunması, məişət tullantılarının Xəzərin faunasına vurduğu ziyanla bağlı ictimaiyyətin maarifləndirilməsindən ibarətdir.