DÜNYA


Çində dünyanın ən sürətli yük qatarları xidmətə başlayıb

Çində sürəti saatda 350 kilometrə çatan yük qatarları xidmətə başlayıb.AZƏRTAC xəbər verir ki, "CRRC Tangshan" şirkətinin istehsalı olan bu qatarlar dünyada sürəti saatda 350 kilometrə çatan ilk yük qatarlarıdır. Qatarın lokomotivi dizayn formasına görə nərə balığına bənzəyir. Bu cür konstruksiya hərəkət müqavimətini əhəmiyyətli dərəcədə azaldır.Qatarlar 110 ton yüklə 1500 kilometr məsafəni 5 saata qət edə bilir. Onların yük məkanından faydalı istifadə əmsalı 85 faiz təşkil edir. Bu da daha çox yükün qısa zamanda ünvanlara çatdırılmasına imkan yaradır.Qeyd edək ki, Çin dünyada ən böyük sürətli dəmir yolu şəbəkəsinə malik ölkədir. Ölkədəki 146 min kilometr uzunluğundakı ümumi dəmir yolu xətlərinin 38 mini sürətli qatarların hərəkəti üçündür.

© Materiallardan istifadə edərkən hiperlinklə istinad olunmalıdır