Kür çayında daşqının baş vermə ehtimalı olan döngələri beton sədlə bərkidilir
19.08.2021 [13:26]
Kür çayı boyunca sahil bərkitmə işləri davam etdirilir. Əsasən çayın daha təhlükəli ola biləcək, itibucaq altındakı sərt döngələrində daş-beton sədlər çəkilir. Məqsəd baş verə biləcək sel daşqınlarının qarşısının alınması və çay boyunca yerləşən təsərrüfatların mühafizəsidir.
AZƏRTAC-ın bölgə müxbiri xəbər verir ki, Azərbaycan Meliorasiya və Su Təsərrüfatı ASC-nin tabeliyində olan Kür-Araz Çaylarında Bəndlərin İstismarı İdarəsi tərəfindən bənd bərkitmə işləri plana uyğun olaraq davam etdirilir. İdarənin balansında ümumi uzunluğu 1491,03 kilometr olan torpaq mühafizə bəndləri var. Bəndlərin 935,88 kilometri Kür çayı, 134,17 kilometri Araz çayı, 421 kilometri isə dağ çayları boyunca yerləşir.
