Çinin Fucien vilayətində bir neçə gündür davam edən şiddətli yağışların törətdiyi fəsadlarla mübarizəyə cəlb olunmuş işçilərdən 4-ü itkin düşüb.
AZƏRTAC vilayət hökumətinin məlumatına istinadla xəbər verir ki, hadisə mayın 7-də səhər Lonyan şəhərinin Sinluo rayonunda baş verib. Onlar Lonçuan çayında suyun səviyyəsini ölçərkən üzərində olduqları körpünü su aparıb. Sinluoda şiddətli yağışların törətdiyi fəsadlarla mübarizəyə müxtəlif qurumlardan 2 mindən çox işçi cəlb olunub. Bölgəyə düşən yağıntının miqdarı (247 millimetr) 1961-ci ildə qeydə alınmış rekordu yeniləyib. İtkin düşənlərin axtarışlarına 500 nəfər cəlb olunub.