Günü-gündən rəqəmsallaşan dövrümüzdə insanlar artıq pul köçürmələrini əksər hallarda elektron şəkildə həyata keçirirlər. Əgər pul vəsaiti göndərilən hesab fiziki şəxsdirsə bu zaman ən çox istifadə olunan üsul kartdan kartadır. Lakin bu zaman ani diqqətsizlikdən köçürmə üçün lazım olan 16 rəqəmdən bir rəqəm səhv olarsa vəsait başqa şəxsin hesabına göndərilir. Bəs belə hallarda həmin vəsaitin geri qaytarılması mümkündürmü? Bank eksperti, hüquqşünas Anar Ramazanovun sözlərinə görə bu cür problemlər 1 rəqəm səhv olanda baş vermir. Çünki bank kartlarını emisiya edən təşkilatlar kartın üzərindəki rəqəmləri unikal şəkildə tərtib etdikləri üçün, bu nömrələr biriylə oxşar olmur. Lakin vətəndaş sözügedən problemlə qarşılaşıbsa bu zaman onun bu məsələylə bağlı bir sıra hüquqları var.