Sentyabrın 16-da səhər saatlarında Çinin şərq sahillərinə çatan “Bebinka” qasırğası ölkənin maliyyə mərkəzi olan Şanxayda həyatı iflic edib.
AZƏRTAC xəbər verir ki, 1949-cu ildən bəri Şanxayı vuran ən güclü qasırğanın gətirdiyi güclü külək və şiddətli yağışlar səbəbindən şəhərin bir neçə rayonunda məktəblər bağlanıb, ictimai nəqliyyatın hərəkəti dayandırılıb, çatdırılma xidmətlərinə fasilə verilib. Pudon, Cinşan, Fensien və Çonmin rayonlarında dövlət qurumlarından başqa bütün iş yerlərinin fəaliyyətinin dayandırılması tövsiyə olunub. Şanxayda ümumilikdə 424 min nəfər təxliyə edilib. Güclü külək şəhərdə elektrik və kommunikasiya xətlərinə ziyan vurub, ağacları aşırıb. Sakinlərə açıq havaya çıxmamaq tövsiyə olunub.