Tarix boyu barıt, kağız, kompass kimi kəşfləri ilə, Böyük Çin səddi, Böyük kanal kimi nəhəng tikililəri ilə dünyanı təəcübləndirən çinlilər elə indi də “dinc” dayanmırlar. Ötən əsrin sonlarında iqtisadi islahatlar başlayandan bəri Çin iri infrastruktur layihələri ilə daim gündəmdə olmağı bacarıb. Bu cür layihələrdən biri də Şencen və Conşan şəhərləri arasındakı nəqliyyat bağlantısı layihəsidir.
AZƏRTAC xəbər verir ki, cari ilin iyun ayında istifadəyə verilən Şencen-Conşan nəqliyyat bağlantısı 2 körpü, bir sualtı tunel və 2 süni adadan ibarətdir. Təxminən 7 ilə inşa edilmiş 24 kilometrlik yolun ümumi məsrəfləri 4,8 milyard dollar təşkil edib. Layihənin məqsədi dünyanın ən çox məskunlaşılan bölgəsi olan Böyük Körfəz Zonasının 2 iri şəhəri - Şencen və Conşan arasında nəqliyyat əlaqəsini yaxşılaşdırmaqdır.