Azərbaycan Dövlət İnformasiya Agentliyi

CƏMİYYƏT

Çinin “Dongfang Electronics Corporation” şirkətinin nümayəndələri Şuşaya səfər edib

17.01.2025 [20:20]

Xəbərin mətni

Çinin “Dongfang Electronics Corporation” şirkətinin nümayəndələri “Azərişıq” ASC-nin işğaldan azad olunmuş ərazilərdə apardığı yenidənqurma, bərpa işləri ilə tanış olmaq üçün Şuşaya səfər ediblər.

AZƏRTAC-ın bölgə müxbiri xəbər verir ki, səfərdə korporasiyanın baş direktor müavini Şitan Cao, Mərkəzi Asiya filialının direktoru Vei Liu, baş menecerin məsləhətçisi Dmitri Jarovski və digər rəsmi şəxslərdən ibarət 9 nəfərlik heyət və “Azərişıq” ASC-nin nümayəndələri iştirak ediblər.

Şuşa Elektrik Şəbəkə Rəqəmsal İdarəetmə Mərkəzində gələn qonaqlara dövlətimizin dəstəyi sayəsində qısa zaman ərzində aparılan yenidənqurma işləri barəsində ətraflı məlumat verilib. Səfər zamanı tərəflər arasında elektrik təsərrüfatının müasir standartlara uyğun qurulması və yeni əməkdaşlıqlar sahəsində təcrübə mübadiləsi aparılıb.