Süfrələrin ən dadlı təamlarımızdan biri, milli yeməyimiz olan xəngəldir. Indi xəngəlin mövsümü başlayıb desək yanılmarıq. Ölkəmizin hər yerində xəngəl bişirilir. Hər bölgədə özünəməxsus formada hazırlanır. Qazaxın yayma xəngəlinin də ayrı ləzzəti, ayrı dadı var.
AZƏRTAC xəbər verir ki, Qazax rayonunun Daş Salahlı kəndində elə ki havalar soyudu, tez tez hazırlanan yeməklərdən biri də yayma xəngəlidir. Ona bəzən “yarpaq xəngəli” də deyilir. Qazax xəngəli digərlərindən elə də fərqlənmir. Əsasən un, su və duzdan ibarət sadə tərkibi xəngəlin hazırlanmasında diqqət yetirilməli bir çox incə məqamlar var. Qonağı olduğumuz Mehdiyevlər ailəsi də uzun illərdir kənddə məhz Qazax xəngəlinin bişirilməsində ustalaşıb, tanınıblar.