Yarandığı ilk illərdən Azərbaycan dəmir yollarının əsas yükünü öz çiyinlərində daşımış Biləcəri stansiyasının nəqliyyat tariximizdə böyük rolu var. Keçmiş SSRİ məkanında ən böyük çeşidləmə stansiyalarından olan bu müəssisədə həm də beynəlxalq yüklərin çeşidləməsi yerinə yetirilir. Təbii ki, uzun müddət öz missiyasını uğurla davam etdirən stansiyada yenidənqurma işlərinə ehtiyac yaranır. Məhz bu məqsədlə Biləcəri çeşidləmə parkında 2023-cü ilin noyabr ayından yenidənqurma işlərinə başlanılır. Cənubdan şimala, qərbdən şərqə bir çox beynəlxalq yükdaşımada önəmli yer tutan dəmir yolu nəqliyyatı və yüklərin çeşidlənməsi parkının ən son standartlara cavab verməsi də başlıca hədəfdir.