Qlobal miqyasda atmosferə buraxılan istixana qazlarının 20 faizə qədəri kənd təsərrüfatı fəaliyyətləri nəticəsində yaranır. Azərbaycanda son 23 ildə ölkə üzrə temperatur anomaliyası 1,1°C olub. 2023-cü ildə orta temperatur 14,6°C-yə çatıb. Bu da 1971-2000-ci ilin norması ilə (12,7°C) müqayisədə 1,9°C dərəcə çoxdur. Son onilliklərdə ən yüksək orta temperatur 2013-cu ildə 14,8°C təşkil edib. Bunu ekologiya və təbii sərvətlər nazirinin müavini Vüqar Kərimov “Avropa və Mərkəzi Asiya ölkələrinin aqroərzaq sektorunda iqlim tədbirlərinin gücləndirilməsi” mövzusunda keçirilən Regional İqlim Konfransında çıxışı zamanı deyib. Nazir müavini qeyd edib ki, 1961-1990-cı illərlə bütün stansiyalarda istilik dalğalarının həm təkrarlanmasında, həm də davamiyyətində artım müşahidə olunub: “Son onilliklərdə bu proseslər dəfələrlə artaraq Bakıda 29, Gəncədə 16, Şəkidə 41 və Lənkəranda 5 dəfə təkrarlanıb. Ən çox artım Bakı və Şəkidə müşahidə olunub”.