Ermənistanın baş naziri Nikol Paşinyanın “Facebook” səhifəsində paylaşımı Gürcüstan ictimaiyyətini hiddətləndirib.Nikol Paşinyan Gürcüstanın Samtsxe Cavaxeti bölgəsində ermənilərin keçirdiyi aksiyadan foto paylaşıb. Paşinyan bölgəni adı “Javakhk” kimi qeyd edib. Xatırladaq ki, əhalinin əksəriyyəti erməni olan Samtsxe-Cavaxeti bölgəsini erməni separatçıları “Javakhk” adlandırırlar və həmin ərazini Gürcüstanın bir hissəsi hesab etmirlər. Təkcə bu fotoya 4 minə yaxın şərh yazılıb və Paşinyan gürcüstanlıların kəskin etirazı ilə qarşılaşıb. Mütəxəssislər bildirir ki, Ermənistanın belə addımları bölgədə yeni gərginlik ocağı yaratmağa yönəlib.