Xaçmazda fəaliyyət göstərən müəssisədə il ərzində 150 ton yeməli göbələk növlərindən olan şampinyon yetişdirilir. AZƏRTAC-ın bölgə müxbiri xəbər verir ki, rayonun Çarxı kəndindəki müəssisədə istehsal olunan məhsul Xaçmazla yanaşı, Quba, Qusar və Sumqayıtda satışa çıxarılır. Sahibkar Ənvər Haqverdiyev bildirir ki, müəssisəni 7 ildir qurublar. İlk illərdə gəlir əldə etmək mümkün olmasa da, indi müəssisə qazanc gətirir. Göbələk əkildikdən sonra bir ay ərzində 3 dəfə məhsul toplanılır. 300 kvadratmetr sahəsi olan istehsalat otağından üç dəfəyə 4 ton göbələk yığılır. Müəssisədə doqquz istehsalat otağı var. Hər il 4 dəfə göbələk yetişdirilməsini həyata keçirən sahibkar, ümumilikdə, 140-150 ton məhsul götürür.