Prezidentlərin Bakıdan verdiyi mesajlar bəzi siyasi dairələrdə narahatlıq yaratdı
29.04.2025 [16:45]
İran İslam Respublikasının Prezidenti Məsud Pezeşkianın Bakıya səfəri, bu çərçivədə keçirilən görüşlər, səsləndirilən fikirlər, hiss olunan səmimi ab-hava ekspertlər tərəfindən olduqca müsbət qiymətləndirilir. Xatırlamaq yerinə düşər ki, İkinci Qarabağ müharibəsindən sonra rəsmi Tehranın yürütdüyü regional siyasət, verilən bəyanatlar iki ölkə arasındakı münasibətlərin gərginləşməsinə səbəb olmuşdu. Bu aspektdən, İran prezidentinin ölkəmizə səfəri, Azərbaycanın ərazi bütövlüyünə və suverenliyinə dəstəyini ifadə etməsi böyük əhəmiyyət daşıyır.
