“Hökumə ilə dostluğumuz AZAL-ın Bakı-Mumbay-Bakı reysində başlayıb. Onunla otaq yoldaşı olmuşam. Ezamiyyət günlərində sevincimizi, kədərimizi bölüşmüşük. Həmin səfərdən videolarımız da qalır. Bakıya qayıdandan sonra o, hər uçuşdan əvvəl mənə ismarış yazıb, uğurlar arzulayardı. İndi o ismarışlara baxanda özümə gələ bilmirəm”.
Bu sözləri AZƏRTAC-ın müxbiri ilə söhbətində AZAL-ın təyyarə bələdçisi Çinarə Məmmədova Bakı-Qroznı uçuşunu yerinə yetirərkən Aktauda qəzaya uğrayan təyyarədə həlak olan stüardessa Hökumə Əliyeva haqqında danışarkən deyib.